| Peuë Makna PARTAI LOKAL keu geutanjoe Bansa Atjèh ? (Part-1) |
 |
Lagèë ka geutanjoë teupeuë, bahwa TUDJUAN
nibak parté lokal njan seubotôidijih untuk
djak piléh anggèëta DPRD I ngon tingkat
II, djak usui tjalon Gubernur, bupati atawa
walikuta. Njan hana meubida, dari hak DPRD
jôh goh lahé UUPA. Seudangkan njang tjok
peunutôh mandum nakeuh Jakarta, njang dalam
hai njoë peuë njang dikheun parté
nasional, lagèë PAN, GOLKAR, P3 leubèh
rajek kuasa, saweuëb awaknjan na waki
droëdjih di Jakarta. Djadi keunelheuëh, di
parté lokal njan pajah keuridja sama ngon
parté nasional watèë awaknjan peurelèë
peusampoë usulandjih dan peugot peungarôh
politék di tingkat Pusat. Djadi peuë tjit
makna parté lokal di Atjèh?
Njang KEUDUA, anggèta2 dewan dari parté
lokal, meunurôt UUPA hana wewenang sapeuë
keutjuali na hak untôk teumanjong
(interplasi) , hak untôk bri peundapat
(konsultasi) dan na hak untuk usui dalam
saboh2 peukara. Awaknjan hana hak untuk
peugot saboh undang2 untuk Atjèh, tjuma nan
mantong anggèëta legislatif/ tapi hana
djibri hak legal meubatjut.
Njang KEULHÈË, parté lokal njan kon saboh
hai barô keu Indon. Dalam pemilu thôn 1955
ka na meuplôh-plôh parté lokal di
Indonesia, njang fungsi djih leubèh
kureuëng saban tjit lagèë parté2 lokal
njang na dan akan lahé di Atjèh. Djadi
peuë tjit njang ka gabuëk that? Njang na
tjit habéh teunaga, gadoh akai dan meupaké
saré keudroë-droë, bak meuseunoh
peungarôh rakjat.
Tags : Peuë Makna PARTAI LOKAL keu geutanjoe Atjèh |
|
Affichage : 4522
Durée : 421 s |
| Peuë Makna PARTAI LOKAL keu geutanjoe Atjèh (Part-2) |
 |
Dalam padum2 boh pasai lam UU Pemeurintah
Kolonial di Atjeh (UUPA), ka meuseubôt,
antara laen: Asas parte politik lokal
handjeuët meuteuntang deungan Pancasila dan
Undang-Undang Dasar RI. Artidjih, hana
meusaboh parté lokal njang keumah bôh narit
"referendum', peuë lom djak meutjeukot
peukara "meurdéhka" dalam program awaknjan.
Lheuhnjan peureulèë ta teupeuë tjit tugaih
dan keuwadjiban parté lokal.
Njang keuphôn, meu-amai deungon Pancasila
dan Undang-Undang Dasar Negara kolonial;
keudua, patôh bak atôran hukôm2 laén,
lagèë peuratôran peumeurintah atawa
keuputôsan presiden; dan keulhèë, peukong
Negara Kesatuan Republik Indonesia. Njoëkeuh
keuwadjiban pokok anggèëta2 parté lokal
euntreuk watèë ka teupiléh. Peukara njang
meusangkôt ngon Atjèh, njan djeuët keu
lumbôi dua. Njoë pajah pham beugot that!
Di sampéng nibaknjan, hak eksekutif ngon
legislative Atjèh njang teuseubôt bak Pasai
8 UUPA, meutuléh bahwa Peumerintah Kolonial
na hak untuk peudjak buët karap dalam bandum
peukara dan urusan masjarakat, teumasôk
dalam suai agama. Djadi peuë njang dipeugah
ta peurintah-keudroë (self government), hana
saboh garéh njang teugaih di sinan, dan deuh
meudjampu lawok deungon kuasa Jakarta.
Meunantjit na peukara2 njang djeuët
djipeuputôih uléh Jakarta keudroë, séb
dji "konsultasi" deungon Peumerintah Atjeh
mantong. Pada hai arti "konsultasi" njan le
that matjam, njang djeuët ta bôh maknadjih
meubagoë. Dan njang leubèh paloë lom, arti
"konsultasi" njoë djipeuteuntèë uléh
Peuraturan Presiden (PP).
Djinoë, watèë ka tapham peuë makna parté
lokalnjan, peuë djeuët ta peugot le
geutanjoë njang mantong seutia keu
perdjuangan Atjeh Merdehka? Bagi geutanjoë,
peumilu lokal thon 2009 saban tjit deungon
harapan2 njang ka ta deungo dalam pemilihan
di Atjeh thôn u likot, bak watee djipiléh
gubernur, bupati dan walikuta seureuta waki2
njan bandum. Njang di sinan, njang na
meugantoë tjuma ureuëng2djih mantong,
seudangkan sistem djih teutap saban dan hana
meubida.
Uléh sabab njan, kamoë lakèë bak bandum
bansa kamoë di nanggroë supaja bèk djak
peurôh droë / bak buët njang hana
meupeuë-sapeuë njan. Njang peureulèë
geutanjoë piké djinoë nakeuh pakiban tjara
tapeusaboh droë-teuh untôk tapeukeumaih
saboh keukuatan untôk tapeupisah droë teuh
deungon Kolonial Indonesia, jôhgoh lom
bumoë Atjéhnjan djiplah, dan djibagi-bagi
dalam padum2 boh propinsi uléh RI dan
antèk2djih di Atjèh. Meukon meunan, masa
ukeuë aneuk tjutjo geutanjoë akan djirasa
akibat dari buët dan tindakan geutanjoë
uroë njoë.
Wabillahit taufiq wal hidajah
wassalamualaikum warahmatullah wabarakatuh
Tags : Peuë Makna PARTAI LOKAL keu geutanjoe Atjèh |
|
Affichage : 2451
Durée : 360 s |
|
|
|
|
|
